Bon dia, dama- y cabayeronan, miembronan di prensa.

Na prome lugar, mi kier a gradici boso pa boso presencia y boso interes continuo den e actividadnan di AFTA. Boso papel como medionan di comunicacion ta crucial pa informa e publico y apoya e transparencia y husticia den nos ambiente empresarial.

E motibo pa e conferencia di prensa aki ta e reaccionnan cu a surgi despues di e conferencia di prensa cu di Sr. Frans Ponson, presidente di e asociacion di empresarionan, Comerciantenan Uni Aruba (CUA), cu a tuma lugar dia 17 di mei ultimo. Durante e conferencia aki, Sr. Ponson a expresa e preocupacion di empresarionan encuanto e supuesto comportacion monopolista di SETAR NV, e empresa mayor di telecomunicacion di Aruba.

Como reaccion, AFTA a emiti un comunicado di prensa ariba 20 di mei, anunciando cu nos lo bai tin un reunion cu SETAR NV, tumando na cuenta e señalnan tocante e adkisicion di ITP Caribbean door di SETAR NV. E reunion aki a tuma lugar dia 5 di juni.

E obhetivo di e conferencia di prensa aki ta pa informa prensa den terminonan general tocante e papel di AFTA y e manera cu nos ta bai realisa nos investigacionnan. Tambe lo tin oportunidad pa haci pregunta na final. Transparencia y comunicacion ta esencial pa nos, y nos kier ta sigur cu boso ta bon informa tocante e papel di AFTA. Di otro banda, e contenido di e investigacionnan di AFTA ta confidencial te na momento cu nan keda conclui formalmente despues di un proceso cuidadoso di coleccion y analisis di tur e hechonan y circunstancianan relevante di tur partidonan involvi y un proceso di audiencia y replica (esta hoor- en wederhoor). Te despues cu conclui e proceso aki AFTA por saca conclusionnan y haci nan publico.

AFTA ta e autoridad independiente di competencia di Aruba. Como un entidad administrativo autonomo cu personalidad huridico (ZBO), nos ta promove y vigila competencia husto y efectivo na Aruba. Esaki ta nifica cu nos ta percura cu e competencia entre empresanan no ta wordo obstrui, limita of falsifica y cu empresanan no ta abusa di nan posicion dominante. Nos tarea principal ta supervisa e cumplimento cu e Ordenanza di Competencia, principalmente pa medio di e supervision y aplicacion di e reglanan di competencia. Pa por realisa esaki, nos ta conta cu instrumentonan efectivo di investigacion y aplicacion. Como ehempel, nos por solicita informacion por escrito y oral, y realisa bishita na empresanan anuncia y no anuncia. Empresanan ta obliga pa coopera cu un investigacion di AFTA, bao castigo di un multa.

Ademas, nos ta duna conseho na gobierno, tanto di forma solicita como no solicita, tocante e implicacionnan di regulacionnan existente y propuesta pa e competencia y tocante e funcionamento di e mercadonan na Aruba.

AFTA ta un organisacion chikito y nos mester determina kiko ta investiga y kiko no. Esaki nos ta haci mediante un maneho di priorisacion. E maneho di priorisacion di AFTA ta un conhunto di normanan y criterianan cu nos ta usa pa determina ki kehonan y ki casonan AFTA lo investiga. Factornan importante den e maneho di priorisacion ta: e impacto ariba bienestar di e consumidor Arubano, e impacto economico, e importancia strategico di e caso, uso eficiente di recursonan, y e peso di prueba legal den e caso. E criterianan aki ta ayuda nos pa enfoca nos recursonan y atencion ariba e casonan mas urgente y cu mayor impacto unda nos por haci un diferencia.

Desde 1 di januari 2024 e reglanan nobo di competencia ta aplicabel y e aña aki nos ta enfoca specificamente ariba e funcionamento di e mercadonan di supermercado y esun di agentenan di real esate y ariba e cumplimento cu e reglanan di competencia den e dos mercadonan aki. Nos lo investiga e mercadonan aki pa e motibo cu nan ta di gran importancia pa e ciudadanonan di Aruba.

Un otro prioridad pa 2024 ta informacion y educacion. Durante e proximo lunanan, nos lo organisa presentacionnan y sesionnan informativo pa diferente partidonan interesa den varios sectornan comercial.

Ademas, e aña aki nos ta contribui na e Proyecto di un ley ariba e tereno di proteccion di consumidor riba invitacion di Minister. Desde 1 di januari 2025, AFTA ta spera di por cuminsa supervisa e cumplimento cu e ley aki tambe. Nos no lo ta ocupa cu e resolucion di disputanan individual entre un consumidor y un empresario. Nos lo actua solamente ora ta trata di un comportacion cu potencialmente ta afecta tur e consumidornan di e empresario of grupo di empresarionan den cuestion. Por pensa, por ehempel, ariba terminonan y condicionnan inhusto of engaño ariba escala grandi.

Nos ta invita cualke persona cu por duna informacion tocante e sectornan prioritario, of otro problemanan den e funcionamento di e mercadonan cu ta di gran importancia pa e ciudadanonan di Aruba, pa tuma contacto cu nos libremente. Por haci esaki a traves di nos website www.afta.awvia di e-mail na [email protected], of door di traha un cita telefonico via 2800480. Nos ta garantisa semper e confidencialidad di e identidad di nos informantenan.

Awor mi ta habri pa ricibi boso preguntanan.

Masha danki.