Oranjestad, 17 september 2024 – Aruba Fair Trade Authority (AFTA) a presenta awe e resultadonan di su investigacion di mercado ariba prijsnan y e structura di e mercado den e sector alimentario na Aruba. E estudio aki, cual a wordo anuncia ariba 22 februaro 2024, ta enfoca ariba e factornan cu ta influencia e prijs di comestibel y e manera cu e mercado local ta funcciona.
Aunke un parti di e prijsnan halto aki ta debi na costonan di transporte – ya cu mayoria di productonan alimenticio na Aruba ta wordo importa – otro factornan tambe ta cucial. E scala chikito di e mercado ariba e isla, e concurencia limita den e cadena logistico y e sistema di impuesto acumulativo ta contribui na e prijsnan mas halto compara cu otro paisnan. Ademas, e acuerdonan di distribucion exclusivo entre importadornan y mayoristanan por ta limitando e concurencia y subiendo e prijsnan mas ainda.
Conclusionnan di e investigacion
- E prijsnan di comestibel na Aruba ta structuralmente mas halto cu na Hulanda y Merca, y nan ta riba mesun nivel cu na Corsou.
- E escala chikito di e mercado, e costonan logistico y e peso di impuesto acumulativo ta contribui na e prijsnan halto.
- Tin preocupacion tocante e concurencia limita den algun segmento di e sector, manera e transporte di containers y e acuerdonan di distribucion exclusivo entre importadornan y mayoristanan.
- Aunque tin suficiente concurencia entre supermercadonan, mester haci mas investigacion pa evalua e impacto di e acuerdonan di distribucion exclusivo ariba e prijsnan.
Siguiente pasonan
AFTA ta anuncia cu e lo inicia dos investigacion adicional: uno ariba e impacto di e acuerdonan di distribucion exclusivo den e sector alimentario y un otro ariba e concurencia den e transporte di containers pa Aruba. E investigacionnan aki ta fundamental pa garantisa competencia husto y prijsnan pagabel pa e pueblo di Aruba.
AFTA ta keda comprometi na e promocion di competencia husto, mihor prijsnan y un structura di mercado cu traha na beneficio di consumidornan.
Pa mas informacion tocante di AFTA por tuma contacto cu nos na:
Tel: (297) 280-0480
E-mail: [email protected]
Website: www.afta.aw